विराटनगर, ३० मंसिर । प्रदेश १ मा सुविधा सम्पन्न जनस्वास्थ्य प्रयोगशाला निर्माण गरिने भएको छ । आगामी असार १५ भित्रमा निर्माण सम्पन्न गर्ने गरी प्रयोगशालाको आज मुख्यमन्त्री शेरधन राईले शिलान्यास गर्नुभयो ।
प्रदेश जनस्वास्थ्य प्रयोगशालाको भवन निर्माण पछि विशिष्टीकृत सेवा प्रदान हुने मुख्यमन्त्री शेरधन राईले बताउनुभयो । उहाँले प्रयोगशालाका नाममा हुने गरेका बेथिति, अनियमितता, सर्वसाधारणलाई ठग्ने कार्यको नियमन हुने बताउनुभयो । उहाँले भन्नुभयो,‘ प्रदेश जनस्वास्थ्य प्रयोगशालाले प्रयोगशालाहरूको पनि प्रयोगशालाका काम गर्ने छ ।’
सामाजिक विकास मन्त्री जीवन घिमिरेले विशिष्टीकृत परीक्षणका लागि काठमाण्डौँ र भारतका विभिन्न सहरहरू जानुपर्ने समस्याको अन्त्य हुने बताउनुभएको छ । प्रदेश जनस्वास्थ्य प्रयोगशालाबाट विशिष्टीकृत परीक्षण हुने उहाँले बताउनुभयो । मन्त्री घिमिरेले भन्नुभयो,‘प्रदेश भित्रका प्रयोगशालाको गुणस्तर मापनको जिम्मेवारी, शुल्कको नियमन, अनुगमनको काम प्रदेश प्रयोगशालाले गर्ने छ ।’ शिलान्यासको ८ महिनापछि सेवा सुरु गरिने दाबी गर्नुभयो । ६ महिना भित्रमा निर्माण सम्पन्न हुने उहाँले बताउनुभयो ।
प्रदेश सभाषद् जयराम यादवले कुनै पनि परीक्षणका लागि काठमाण्डौँ धाउनुपर्ने समस्याको अन्त्य हुने विश्वास व्यक्त गर्नुभयो । उहाँले निश्चित समयमा भवन निर्माण गरी सेवा सुरु गर्न सुझाव दिनुभयो ।
विराटनगर महानगरपालिकाका प्रमुख भीम पराजुलीले विराटनगरमा प्रदेश स्तरीय जनस्वास्थ्य निर्माण हुने गौरवको विषय भएको बताउनुभयो । उहाँले प्रयोगशाला निर्माणका लागि आवश्यक सहयोग गर्न महानगर तयार रहेको बताउनुभयो ।
प्रयोगशालामा जेनरल ल्याब, नसर्ने रोग, सरुवा रोग, पीसीआर भाइरल कल्चर परीक्षण लगायतका काम हुने प्रदेश जनस्वास्थ्य निर्देशक जयवेन्द्र यादवले बताउनुभयो ।
शिलान्यास कार्यक्रममा स्नातकोत्तर क्याम्पस विराटनगरका प्रमुख महेश खत्री, सेभ चिल्ड्रेन प्रदेश १ र २ का वरिष्ठ परियोजना व्यवस्थापक हरिवोल बजगाई, विराट मेडिकल कलेजका प्रयोगशाला विज्ञ सन्तोष काफ्ले लगायतले बोल्नु भएको थियो । सेभ द चिल्ड्रेन र ग्लोवल फण्डसँगको सहायतामा जनस्वास्थ्य प्रयोगशाला निर्माण गरिने भएको छ । भवन निर्माणका लागि ८ करोड बजेट उपलब्ध गराइने सेभ द चिल्ड्रेनका वरिष्ठ व्यवस्थापक बजगाईले जानकारी दिनुभयो ।
प्रदेश जनस्वास्थ्य प्रयोगशालाका लागि स्नातकोत्तर क्याम्पसले ८ कट्ठा १२ धुर जमिन उपलब्ध गराएको छ ।
