काठमाडौँ, १७ असोज । देशका विभिन्न कारागारमा रहेका ७ सय भन्दा बढी कैदीबन्दीलाई कोभिड–१९ सङ्क्रमण भएको छ । ७०० बढी कैदीबन्दीमा कोरोना संक्रमण देखिएको कारागार व्यवस्थापन विभागले जनाएको हो । सङ्क्रमितमध्ये अहिलेसम्म ८ जनाको मृत्यु भएको विभागका सूचना अधिकारी देवर्षि सापकोटाले जानकारी दिए ।
त्यसमध्ये सबैभन्दा बढी केन्द्रीय कारागार कार्यालय सुनधारामा रहेका ६ सङ्क्रमितको मृत्यु भएको जनाइएको छ । बाँके र मोरङमा एकाएक जनाको निधन भएको सापकोटाले बताए ।
प्राप्त विवरणअनुसार अहिलेसम्म विभिन्न कारागार कार्यालयका एक हजार ९०० बढीको पिसिआर परीक्षण भएको थियो । त्यसमध्ये ७०० पोजेटिभ भएको र झन्डै २०० उपचारपछि निको भएको जनाइएको छ । विभागले ज्वरो, खोकी आएका र सम्भावित लक्षण देखिएकाको परीक्षण गर्ने गरेको छ । सङ्क्रमण फैलिन नदिन स्वास्थ्य सुरक्षा मापदण्ड लागू गरी उच्च सावधानी अपनाइएको र बाहिरको भेटघाटलाई समेत बन्द गरिएको छ । आफन्तले ल्याएको खानेकुरासमेत प्रवेश निषेध गरिएको सूचना अधिकारी सापकोटाले बताए ।
शङ्कास्पद व्यक्तिलाई क्वारेनटिनमा राखेर उपचार गर्ने गरिएको छ । विभागका अनुसार पर्सा, बाँके, स्याङ्जा, ललितपुर, सिन्धुपाल्चोक, काठमाडौँ, पाँचथर, जुम्ला, सप्तरी, सिराहा, सुनसरी, मोरङलगायत कारागारमा कोरोना देखिएको छ ।
