काठमाडौँ । हालै सम्पन्न जेनजी आन्दोलनका क्रममा सर्वोच्च अदालतमा भएको आगजनी र तोडफोडसँग सम्बन्धित पाँच जनालाई प्रहरीले पक्राउ गरेको छ। पक्राउ पर्नेहरूमा राजु परियार, कुमार पराजुली, सुशील श्रेष्ठ र ज्योति थापा घतानी रहेका छन्। प्रहरीका अनुसार पाँचौँ व्यक्तिको पहिचान खुलिसकेको छैन।
जिल्ला प्रहरी परिसर काठमाडौँका प्रवक्ता पवनकुमार भट्टराईले जानकारी दिए अनुसार, अदालतमा आगजनी गर्नेमध्ये अन्य केही व्यक्तिहरूको पहिचान भइसकेको छ र उनीहरूलाई पनि छिट्टै कानुनी दायरामा ल्याइने छ। सर्वोच्च अदालतले परिसरमा दिएको जाहेरीअनुसार, आगजनीका घटनाबारे छानबिन गरिनुपर्ने व्यवस्था गरिएको थियो।
पक्राउ परेका व्यक्तिहरू जेनजी आन्दोलनका क्रममा भएको विभिन्न आपराधिक गतिविधिसँग सम्बन्धित छन्। प्रहरीले जनाएको छ कि आन्दोलनका समयमा काठमाडौँमा मात्रै ४९ जनाको मृत्यु भएको छ, जसमा सात जनाको पहिचान अझैसम्म हुन सकेको छैन। त्यस्तै, हराएका सात जनाको हुलिया पनि प्रहरीले प्राप्त गरेको छ।
जिल्ला प्रहरी परिसर काठमाडौँका तथ्यांक अनुसार, आन्दोलनका क्रममा आगजनी, तोडफोड र आपराधिक उपद्रवसम्बन्धी १०४ वटा जाहेरी दर्ता भएका छन्। यसमध्ये २२ व्यक्तिगत, ६६ सरकारी कार्यालय र १६ संस्थागत वा व्यापारिक प्रतिष्ठानसम्बन्धी छन्।
त्यसै गरी, विभिन्न अपराधमा १५४ वटा दर्ता भएको, २६७ जनालाई पक्राउ गरिएको, ८७ जना हाजिर जमानीमा छुटेका, ११३ जना हिरासतमा रहेको, ३३ जना धरौटीमा र ४३ जना पुर्पक्षका लागि थुनामा राखिएको प्रहरीले जनाएको छ।
