काठमाडौं । देशभर तनावपूर्ण परिस्थिति बढिरहेका बेला राजधानीस्थित विभिन्न कारागारहरूबाट कैदीबन्दीहरू निस्किएको समाचार आएको छ। विशेष गरी सुन्धारास्थित केन्द्रीय कारागारबाट मङ्गलवार राति करिब तीन हजार कैदीबन्दी एकै पटक बाहिर निस्केका छन्।
कारागार प्रशासनका अनुसार सुरक्षाकर्मीको संख्यामा कमी भएकाले कैदीबन्दीलाई नियन्त्रण गर्न कठिनाइ भएको र सोही अवसरमा कैदीहरू बाहिरिएको बताइएको छ। नक्कली भुटानी शरणार्थी प्रकरणमा पुर्पक्षका लागि थुनामा रहेका पूर्वउपप्रधान तथा पूर्वऊर्जा मन्त्री टोपबहादुर रायमाझी पनि निस्केकामध्ये एक भएका छन्।
यससँगै सुन्धाराकै महिला बन्दीगृहबाट समेत थुप्रै महिला कैदीबन्दी बाहिरिएको पुष्टि भएको छ। त्यस्तै, ललितपुरको नक्खु कारागारबाट पनि मङ्गलवारकै दिन सबै कैदी निस्किएका थिए। डिल्लीबजार कारागारमा भने कैदीबन्दी निस्कने प्रयास गरेको भए पनि नेपाली सेनाले तत्काल हस्तक्षेप गरी केहीलाई नियन्त्रणमा लिएर सुरक्षित स्थानमा स्थानान्तरण गरेको स्रोतले जनाएको छ।
कारागार प्रशासन र सुरक्षा निकाय अहिलेको परिस्थितिलाई नियन्त्रणमा ल्याउन थप रणनीति बनाउँदै छन्। एकै पटक कैदीबन्दीको यस्तो ठुलो संख्यामा निस्कनु नेपालको कारागार प्रणाली र सुरक्षातन्त्रका लागि गम्भीर चुनौती बनेको छ।
