मोरङ । निजी तथा आवासीय विद्यालय अर्गनाइजेशन नेपाल (प्याब्सन) ले १४औँ प्याब्सन स्र्पोट मिट २०८१ गर्ने भएको छ । मङ्गलवार मोरङको विराटनगरमा रहेको प्याब्सनको कार्यालयमा पत्रकार सम्मेलन गरी प्याब्सन मोरङले जानकारी गराएको हो ।
माघ १८ गते शुक्रवारदेखि २० गते आइतबारसम्म सहिद रङ्गशाला खेल मैदान, विराटनगर, जुटमिल खेल मैदान रानी र एभरेष्ट स्कुल विराटनगरको खेल मैदानमा विभिन्न खेलकुद कार्यक्रम सञ्चालन हुने प्याब्सन मोरङले जनाएको छ । प्याब्सन मोरङका अध्यक्ष जगत बस्नेतका अनुसार मोरङका २ सय १० वटा विद्यालयहरूबाट ३ हजार भन्दा बढी खेलाडीहरू प्रतिस्पर्धामा सहभागी हुने छन् ।
कार्यक्रममा रु.१५ लाख खर्च हुने अनुमान रहेको छ । राष्ट्रको खेलकुद विकासको लागि, स्वास्थ्य र सभ्य समाजको लागि प्याब्सन स्र्पोट मिट भन्ने मूल नाराका साथ १४औँ प्याब्सन स्र्पोट मिट २०८१ को समुद्घाटन कोशी प्रदेशका सामाजिक विकास मन्त्री पाचकर्ण राईद्वारा हुने अध्यक्ष बस्नेतले जनाएका छन् ।
प्याब्सन मोरङले २०६३ साल देखी प्रत्येक वर्ष जिल्ला स्तरीय खेलकुद सञ्चालन गर्दै आएको सचिव देबि सिटौला बताउँछन् । भलिबल, फुटबल, बास्केटबल, टेबल टेनिस, लङ जम्प, हाइ जम्प, ट्रिपल जम्प, सर्टपुट, दौड लगायत २० भन्दा बढी विभिन्न विधामा प्रतिस्पर्धा हुने आयोजकले जनाएको छ ।
